M.F.Axundzadə adına Şəki şəhər Mədəniyyət Mərkəzinin tabeliyində  fəaliyyət göstərən M.İsmayılov adına diyarşünaslıq evi, MKS-nin  N.Nərimanov  adına 8  saylı kitabxana  filialı ilə  birgə  xalq şairi  Mikayıl Müşfiqin  anadan olmasının 110 illiyinə həsr olunmuş “İşıqlı dünyadan necə əl çəkim” adlı xatirə axşamı təşkil etmişdir. Tədbiri giriş sözü ilə  diyarşünaslıq evinin direktoru Tahirə Qarayeva açdı və şairin həyat və yaradıcılığı haqqında geniş məruzə ilə çıxış edərək bildirdi ki, Müşfiq poeziya aləmində ildırım kimi çaxdı, şimşək kimi parladı. Sonra bu parıltı günəşə, ulduzlara çevrildi və hələ də parlamaqdadır. Hələ min illər sonra da parlayacaqdır. Müşfiqin yaradıcılığı haqqında çox yazılıb. Onun həyat və yaradıcılılığına şeirlər, poemalar, əsərlər, məqalələr həsr  olunub. Bir sözlə onun haqqında günlərlə, aylarla danışsaq bitməz. Sonra söz 19 saylı məktəbin Ədəbiyyat müəllimi Afət Səmədovaya  verildi. Afət müəllimə  qeyd etdi ki, Müşfiqi bütün nəsillərə sevdirən  onun ürəkdən gələn  səmimiyyət dolu poeziyasının xalq ruhu ilə bağlılığı, doğma Azərbaycanımızı böyük məhəbbətlə tərənnüm etməsi, qəlbləri sevindirməsidir. Müşfiq ədəbiyyat tariximizdə, xalqımızın yaddaşında və qəlbində otuz yaşlı çılğın, romantik xəyallar dünyasında qanadlanan bir gənc kimi qalacaq. Ömrümüzün hər çağında alovlu  şairin billur saf,  axıcı  misralarını xatırlayacaq,  nəğmələrini  dinləyəcək,  amma içəri  dünyamızda daima onun tükürpədici harayını da  eşidəcəyik.

Tədbirdə 19 saylı məktəbin şagirdlərinin  ifasında şairin “Ana”, “Həyat sevgisi”, “Yenə o bağ olaydı”, “Yadıma düşdü”, “Sənə qurban” və s. şeirlər səsləndi.