Noyabrın 22-də Azərbaycan Respublikası Mədəniyyət Nazirliyinin müvafiq əmrinə əsasən, Şəki şəhərində Bakı Xoreoqrafiya Akademiyasının mütəxssisləri tərəfindən ustad dərsləri keçirilib. Ustad dərslərini BXA-nın kafedra müdiri, əməkdar artist Sənan Hüseynli və BXA-nın müəllimi, Prezident təqaütçüsü Çinarə Quliyeva aparıblar.

Şəki 4 №-li uşaq musiqi məktəbinin konsert zalında reallaşan tədbirdə Şəki Regional Mədiniyyət İdarəsinin əhatəsində olan Şəki, Balakən, Zaqatala və Qax rayonlarının uşaq incəsənət məktəbləri, mədəniyyət evləri və klublarında çalışan xoreoqrafiya üzrə mütəxəssislər və onların şagirdləri iştirak ediblər.

Şəki Regional Mədəniyyət İdarəsnin rəisi Mirvari Zeynalova tədbirdə iştirak edən ustad müəllimləri, rayonlardan dərslərə cəlb edilmiş yeniyetmə rəqqasları və digər iştirakçıları salamladıqdan sonra dərslərə start verilib. Əvvəlcə kollektivlərin ifasında bir neçə rəqs təqdim olunub. Sonra BXA-nın aparıcı müəllimləri tərəfindən xüsusi innovativ proqram üzrə məşgələlər keçirilib.

Əməkdar artist Sənan Hüseynlinin verdiyi məlumata görə, Mədəniyyət Nazirliyi tərəfindən təşkil edilən ustad dərsləri əsasən respublikanın şəhər və rayonlarında xoreoqrafiya sənətinin təblig edilməsi, uşaq incəsənət məktəblərinin xoreoqrafiya şöbələrində tədrisin keyfiyyətinin, habelə məktəblərdə və digər mədəniyyət müəssisələrində xoreoqrafiya sahəsi üzrə mütəxəssislərin peşəkarlıq səviyyəsinin artırılması və eyni zamanda bu sahədə  istedadlı  yeniyetmələrin aşkar edilməsi məqsədini daşıyır.