Aprelin 26-da Şəki şəhər Heydər Əliyev Mərkəzində azyaşlılar üçün nəzərdə tutulan “Bizim böyük Qələbəmiz” kitabının təqdimat mərasimi keçirilib.

Bakı Şəhər İcra Hakimiyyəti və “Regional İnkişaf” İctimai Birliyi tərəfindən birgə hazırlanan kitabın təqdimat mərasimində şəhər rəhbərliyi, ictimaiyyət nümayəndələri, müəllimlər, şagirdlər və könüllülər iştirak ediblər.

Tədbir iştirakçıları əvvəlcə Mərkəzin foyesində rəflərə düzülmüş “Bizim böyük Qələbəmiz” kitabı ilə tanış olublar. Onlara kitab haqqında qısa məlumat verilib. Tədbir iştirakçıları, həmçinin foyedə məktəblilərin vətənpərvərlik mövzusunda çəkdikləri rəsm əsərlərindən ibarət sərgiyə də baxıblar.

Mərkəzin akt zalında keçirilən təqdimat mərasimində Şəki Şəhər İcra Hakimiyyəti başçısının müavini Zərinə Cavadova çıxış edərək, “Bizim böyük Qələbəmiz” kitabı haqqında geniş məlumat verib. Bildirilib ki, kitabda tariximizin maraqlı və şanlı səhifəsi əks olunub, işğal altında olan torpaqlarımızın azad edilməsi uğrunda aparılan 44 günlük Vətən müharibəsindən, bu müharibədə Müzəffər Ali Baş Komandan, Azərbaycan Prezidenti İlham Əliyevin rəhbərliyi ilə qazanılan tarixi Qələbədən bəhs edilib. Vurğulanıb ki, kitabla tanış olan azyaşlılar Zəfər tariximizi daha yaxından öyrənmək imkanı qazanacaqlar.

Tədbirdə Şəki Regional Mədəniyyət İdarəsinin tabeliyində olan şəhər 3 saylı Uşaq Musiqi Məktəbinin kollektivi maraqlı konsert proqramlaeı ilə çıxış edib.

Məktəbin direktoru Şəmsiyyət Əsgərova çıxış edərək, təqdimatı keçirilən kitabın uşaqlarda vətənpərvərlik ruhunun möhkəmləndirilməsində böyük rol oynayacağını bildirib, kitabın müəlliflərinə və tədbirin təşkilatçılarına minnətdarlıq edib.

Tədbirdə çıxış edən Şəki Şəhər İcra Hakimiyyətinin başçısı Elxan Usubov “Bizim böyük Qələbəmiz” kitabının kiçik yaşlı uşaqların ölkəmizin tarixini öyrənməsi, onların Vətənə məhəbbət ruhunda tərbiyə olunmasına gözəl bir töhfə olduğunu vurğulayıb, kitabın ərsəyə gəlməsində zəhməti olanlara təşəkkürünü bildirib.