Şəkidə Vətən müharibəsi qazisi Elnur Rəsulovun toy məclisi keçirilib.

Şəhərin “Büllur” şadlıq sarayında baş tutan toy məclisində Şəki şəhər İcra Hakimiyyətinin, Səfərbəylik və Hərbi xidmətə çağırış üzrə Dövlət xidmətinin Şəki şöbəsinin, Şəki şəhər Gənclər və İdman İdarəsinin, Şəki Bələdiyyyəsinin nümayəndələri, qazilər, müharibə iştirakçıları, qohumlar və Şəki şəhər 3 №-li Uşaq Musiqi məktəbinin kollektiv üzvləri iştirak ediblər.

Qeyd edək ki, Azərbaycan Respublikasının Silahlı Qüvvələrində müddətdən artıq xidmət göstərən hərbi qulluqçu Elnur Rəsulov Füzuli və Hadrut istiqamətində gedən döyüşlərdə fəal iştirak edib. Oktyabrın 2-də şiddətli döyüşlər zamanı ağır yaralanaraq ayağını itirib və bir müddət hərbi hospitalda müalicə olunub.

Müzəffər Ali Baş Komandan cənab İlham Əliyevin sərəncamına əsasən qəhrəmanımız “Füzulinin azad olunmasına görə”, “Xocavəndin azad olunmasına görə”, “Qubadlının azad olunmasına görə” və “İgidliyiə görə” medalları ilə təltif edilib.

Toy məclisində Şəki şəhər 3 №-li Uşaq Musiqi məktəbinin direktoru Şəmsiyyət Əsgərova Şəkinin çoxsaylı mədəniyyət işçiləri adından çıxış edərək, evlilik həyatına qədəm qoyan gəncləri təbrik edib, onlara ailə səadəti arzulayıb.  Ş. Əsgərova çıxışında 44 günlük Vətən müharibəsində şanlı tarix yazan Vətən oğullarının qəhrəmanlığından, Silahlı Qüvvələrimizin misilsiz rəşadətindən, hərbçilərimizin əzmkarlığından, xalqımızın mübarizliyindən danışaraq, əldə olunan uğurları Prezident-Xalq birliyinin şərtləndirdiyini xüsusi vurğulayıb.O, ölkəmizin ərazi bütövlüyünün təmin olunması uğrunda hərbi əməliyyatlarda əsgər və zabitlərimizin göstərdikləri şücaətlərin hər birimizdə sonsuz iftixar hissi doğurduğunu qeyd edib.

Şəki şəhər 3 №-li Uşaq Musiqi məktəbinin müəllimlərindən ibarət musiqi qrupunun çıxışları məclisə xüsusi təravət bəxş edib.