Azərbaycanın ərazi bütövlüyü uğrunda döyüşlərdə şəhidlik zirvəsinə ucalan qəhrəman Vətən oğullarından biri də Şəki şəhərindən olan Əliyev Zaur Eldar oğludur. Oktyabr ayının 14-də şəhidin şəhadətə yüksəlməsinin bir ili tamam olur.

Zaur Əliyevin şəhidlik zirvəsinə yüksəlməyinin bir illiyi ilə əlaqədar Rəşid bəy Əfəndiyevin ev muzeyinin və 4№-li kitabxana filialının kollektivləri şəhidin ailəsinə baş çəkib, ailə üzvləırinə maddi və mənəvi dəstək göstəriblər.

Görüşdə  44 gün davam edən Vətən müharibəsində rəşadətli Azərbaycan Ordusunun Müzəffər Ali Baş Komandanı İlham Əliyevin rəhbərliyi ilə qazandığı tarixi Qələbədən söz açılıb, zəfərlə başa çatan müharibədə Vətənimizin igid oğullarının göstərdikləri qəhrəmanlıqlardan danışılıb.

Zaur Əliyev 1989-cu ildə Şəki şəhərində anadan olub. 27 sentyabr 2020-ci ildə başlayan Vətən müharibəsinə könüllü olaraq yazılmış və həmin tarixdən böyük Vətən müharibəsi döyüşlərində fəal iştirak etmişdir. 14 oktyabr 2020-ci tarixdə Ağdərə rayonunun işğaldan azad edilməsi uğrunda gedən döyüş zamanı qəhrəmancasına şəhidlik zirvəsinə ucalıb.

Döyüşlərdə göstərdiyi igidliyə görə, o, ölümündən sonra “Vətən uğrunda”medalı ilə təltif edilib.