Oğuz rayonunda Vətən müharibəsinin ilk günlərində qəhrəmanlıqla həlak olmuş Elman Babayevin anım günü ilə əlaqədar tədbir keçirilib.

Anım tədbirində Şəhidin ailə üzvləri, Rayon İcra Hakimiyyətinin, Rayon Gənclər və İdman İdarəsinin nümayəndələri, Vətən müharibəsi iştirakçıları, Mərkəzi kitabxananın əməkdaşları və rayon ictimaiyyəti rayon Şəhidlər xiyabanını ziyarət edib, şəhid məzarlarının üzərinə təzə gül- çıçək dəstələri düzüb, burada əbədiyyətə qovuşan Vətən övladlarını ehtiramla yad ediblər.  

Şəhidin doğulduğu evdə davam edən mərasimdə onun həyat və döyüş yoluna nəzər salınıb, onunla bağlı xoş xatirələr səsləndirilib. Bildirilib ki, Azərbaycan Silahlı Qüvvələrinin müddətli həqiqi hərbi xidmət qulluqçusu olan Elman Babayev 2020-ci il sentyabrın 27-də Azərbaycan və Ermənistan arasında başlanan II Qarabağ müharibəsi zamanı Murovdağ döyüşlərində fəal iştirak edib və sentyabrın 29-da Murovdağ döyüşlərində qəhrəmancasına Şəhidlik zirvəsinə ucalıb.

Azərbaycanın ərazi bütövlüyünün bərpa edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarıına əsasən Elman Babayev ölümündən sonra "Vətən uğrunda", "Kəlbəcərin azad olunmasına görə" və "Hərbi xidmətlərə görə" medalları ilə təltif edilmişdir.