Şəki 12 saylı orta məktəbdə Ü.Hacıbəyov adına folklor evi, MKS-nin 13 saylı kitabxana filialı və 12 saylı məktəbin birlikdə hazırladıqları Azərbaycan Xalq Cümhuriyyətinin 100 illiyinə həsr olunmuş “Şan və şərəf dolu istiqlal tariximiz” adlı musiqili ədəbi-bədii gecə keçirildi. Azərbaycanın Dövlət Himni səsləndirildi. Sonra tədbiri 12 saylı orta məktəbin müəlliməsi Təranə Musayeva tədbir iştirakçılarını salamlayaraq sözü təhsil şöbəsinin işçisi Gülxar xanıma verdi. Gülxar xanım çıxışında qeyd etdi ki, 1918-ci il may ayının 28-də Azərbaycan milli şurası tərəfindən “İstiqlal bəyannaməsi” qəbul edildi. Yeni qurulan Azərbaycan Xalq Cümhuriyyəti  öz üzərinə götürdüyü çətin tarixi vəzifəni imkanlarının ən son həddində çalışaraq şərəflə yerinə yetirdi. Daha sonra folklor evinin metodisti Təranə İmamverdiyeva və kitabxananın filialının müdiri Göhər Bəkirova çıxış etdilər. Tədbirdə Azərbaycan Xalq Cümhuriyyətinin 100 illiyinə həsr olunmuş video çarx  və məktəblilərin ifasında səhnəciklər nümayiş etdirildi, şeirlər səsləndirildi.