Xalqımızın qeyri-maddi mədəni irsinin qorunması, qədim oyunlarımızın yaşadılması, gənc nəslə tanıdılması sahəsində son illər Mədəniyyət və Turizm Nazirliyi tərəfindən çoxsaylı tədbirlər həyata keçirilir.

Belə tədbirlərdən biri də qədim atüstü milli oyunlarımızın təbliği məqsədi ilə ardıcıl olaraq təşkil edilən Çövkən oyunlarıdır.

Şəki Atçılıq Turizm Mərkəzində ardıcıl olaraq Çövkən oyunlarının keçirilməsi ənənəyə çevrilmişdir.

Oğuz rayonunda da bu oyunların təbliği məqsədi ilə Çövkən komandası yaradılmışdır. Komandamız Atüstü Milli Oyunlar Festivallarında ardıcıl olaraq iştirak etmiş və uğurlarına görə nazirliyin diplom və pul mükafatlarına layiq görülmüşdür.

Bu günlərdə Zərrab kənd klubu nəzdində fəaliyyət göstərən Çövkən komandası Yaqublu kəndində maraqlı oyun təşkil etmişdir. “Qartal” və “Zirvə” komandaları yarışmışdır. Oyun 4:1 hesabı ilə Zirvə komandasının qələbəsi ilə qurtarmışdır. Oyunu kənd sakinləri, gənclər, mədəniyyət işçiləri izləmişdir.

Şəki Regional Mədəniyyət və Turizm İdarəsinin baş məsləhətçisi U.Baxışova maraqlı oyuna görə komandanın üzvlərinə təşəkkür etmiş və onlara qiymətli hədiyyələr təqdim etmişdir.

Çövkən oyunlarının ardıcıl olaraq təşkil olunması nəzərdə tutulmuşdur.