28.02.2026
28 fevral 2026- cı il tarixdə Şəki-Zaqatala Regional Mədəniyyət İdarəsinin, Şəki şəhər 4 nömrəli Uşaq Musiqi məktəbinin dəstəyi, Şəki şəhər Heydər Əliyev Mərkəzinin və M.F.Axundzadə adına Mədəniyyət Mərkəzinin tabeliyində fəaliyyət göstərən "Narınqala" şəhər Folklor evinin birgə təşkilatçılığı ilə şəhid mayor Aqşin Abdullayevin anım gününə həsr olunmuş "Səssiz addımların qəhrəmanı" adlı tədbiri keçirilib.
Şəki şəhər Heydər Əliyev Mərkəzində keçirilən tədbirdə Şəki şəhər İcra Hakimiyyətinin, hüquq mühafizə orqanlarının əməkdaşları, Şəki Zaqatala Regional Mədəniyyət İdarəsinin, YAP Şəki şəhər təşkilatının, Mədəniyyət İşçiləri Həmkar İttifaqı Şəki şəhər Komitəsinin, Şəki-Zaqatala Regional Təhsil İdarəsinin və digər dövlət orqanlarının məsul şəxsləri, mədəniyyət və təhsil işçiləri, hərbçilər iştirak edib.
Tədbirdə Azərbaycan Respublikasının Dövlət Himni səsləndirib, şəhidlərin əziz xatirəsi bir dəqiqəlik sükutla yad edilib, şəhidin həyat və döyüş yolunu əks etdirən videoçarx nümayiş olunub.
Şəki 4 nömrəli Uşaq Musiqi məktəbinin müəllimlərindən ibarət ansamblın ifasında vətənpərvər motivli musiqilər səsləndirilib, tədbir boyu kompozisiyalar, rəqslər nümayiş etdirilib.
Tədbirdə çıxış edənlər şəhid mayor Aqşin Abdullayevin şərəfli həyat və döyüş yolundan bəhs edib, onun Vətənə, torpağa və dövlətə olan sadiqliyi xüsusi vurğulanıb. Qeyd olunub ki, Aqşin vətənpərvərliyi ilə gənc nəsil üçün əsl nümunədir. Onun xatirəsi daim qəlblərdə yaşayacaq və göstərdiyi qəhrəmanlıq heç zaman unudulmayacaq.
Tədbirin təşkil edilməsində məqsəd şəhid mayor Aqşin Abdullayevin əziz xatirəsini yad etmək onun keçdiyi şərəfli ömür yolunu gənc nəslə tanıtmaq, vətənpərvərlik ruhunu gücləndirmək və vətən uğrunda canlarından keçən şəhidlərin qəhrəmanlığını gələcək nəsillərə çatdırmaqdır.