22.11.2024
22 noyabr 2024-cü il tarixdə Şəki-Zaqatala Regional Mədəniyyət İdarəsinin təşkilatçılığı ilə Şəki şəhər Heydər Əliyev Mərkəzində "Yaşıl dünya naminə media həmrəyliyi" adlı konfrans-konsert keçirilib.
Konfrans başlamadan öncə ölkəmizin təbiətini və iqlimini əks etdirən "Yaşıl dünya naminə həmrəy olaq" adlı sərgiyə baxış keçirilib.
Daha sonra konfrans öz işinə başlayıb. Konfransda “İcitimai Tv” nın bölgə müxbiri Rasim İslamov, “Şəki Bələdiyyəsi” qəzetinin redaktoru Murad Nəbibəyov, Şəki şəhərində fəaliyyət göstərən “Kanal S” televizyasının xəbərlər departamentinin müdiri Gülgəz Mustafayeva, “Şhaki Media”nın təsisçisi İbrahim Yunusov, “İpəkçi” qəzetinin təsisçisi Aydın Salisoğlu konfransda iştirak ediblər.
Konfransı çıxış sözü ilə açan Şəki-Zaqatala RMİ-nin rəisi v.i.e Nargilə Qafarova 2024 -cü ilin ölkəmizdə
“Yaşıl dünya naminə həmrəylik ili” elan olunmasının önəmini qeyd edərək, Azərbaycanın dünyada iqlim dəyişmələrinin fəsadlarına qarşı mübarizəyə öz töhfəsini verməsindən bəhs edib.
Daha sonra çıxış edən Şəki-Zaqatala RMİ-nin media üzrə aparıcı məsləhətçisi Vüsal Həsənov medianın əhatə dairəsinin yalnız informasiya ötürücülüyü funksiyası daşımaq olmayıb, eyni zamanda ekoloji tarazlığın qorunması istiqamətində doğru informasiya ilə təmin edilməsində vacib rolu olduğunu vurğulayıb.
Tədbirə dəvət edilən media nümayəndələri də “Yaşıl dünya naminə həmrəylik ili” çərçivəsində görülən işlərdən, COP29 konfransının ölkəmizdə keçirilməsinin önəmindən, bu istiqamətdə medianın funksionallığından və medianın üzərinə düşən öhdəliklərdən danışıblar.
Konsert proqramı ilə davam edən tədbirdə COP29 və Azərbaycan təbiətini özündə əks etdirən videoçarx nümayiş olunub, Eldar Rəcəbovun rəhbərlik etdiyi Şəki şəhər Uşaq İncəsənət məktəbinin "Zəfər " ansamblının müşayəti ilə Fərqanə Salamova "Ölkəm", Hüsniyyə Hacıyeva-Fərqanə Salamova "Azərbaycan", Anar Xan "Daglar", Sərxan Hüseynov "Mavidir" və Namiq Aslanın ifasında "Köçür durna qatarı" milli müsiqi nümunələri səsləndirilib, "İncəlik rəqsi", "Azərbaycan suitası" kimi rəqs nümunələri ifa olunub.
Konsertdə Şəki şəhər İcra Hakimiyyətinin, YAP Şəki şəhər Təşkilatının rəhbərliyi, Şəki şəhərində fəaliyyət göstərən dövlət qurumlarının nümayəndələri, mədəniyyət və təhsil işçiləri, ictimaiyyət nümayəndələri iştirak ediblər.
Tədbirin sonunda media nümayəndələri Şəki-Zaqatala RMİ tərəfindən səmərəli fəaliyyətlərinə görə təltif edilib və hədiyyə verilib.